29/04/2009 - Quando ainda estám recentes as duas agressons consecutivas recebidas polo centro social Aturujo de Boiro na semana passada, o fascismo ‘callejero’ desponta novamente no nosso País. Agora, na cidade de Lugo. Elementos neonazis preparam para 2 de Maio um acto público na cidade das muralhas. Como reacçom, o centro social Mádia Leva! chama a mobilizar-se “contra a ameaça fascista” e convoca a I Jornada Antifascista à que chama a participar a “lugueses e nom lugueses”. De Ceivar aderimo-nos e fazemo-nos eco desta convocatória convidando à sua máxima difusom.

28/04/2009 - As agressons ao tecido organizativo nacionalista som mais umha forma de repressom. Segundo denunciam sócios e sócias do centro social Aturujo de Boiro, o local foi atacado duas vezes consecutivamente na última semana. Os ataques produzidos nas noites da quinta-feira 23 e de sábado 25 supugérom a rutura de várias lunas do centro social. Sejam quais forem os agentes indutores da acçom, trabalham objectivamente a favor das estratégias de controlo preventivo, amedrentamento e erosom económica que o Estado reserva ao tecido associativo nacionalista mais crítico e combativo.

27/04/2009 - O Julgado de Instruçom nº 2 de Vigo ditou na passada semana umha sentença absolutória contra dez activistas processad@s por umha “falta leve de respeito e consideraçom devida à autoridade”, que se concretava neste caso nos ‘antidistúrbios’ que em 13 de Setembro passado “protegiam” a privatizada Ilha de Toralha ante a mobilizaçom popular que reivindicava o desfrute público do litoral. A presença policial em Toralha dera lugar na data a incidentes com @s manifestantes, resultado vári@s identificad@s e, posteriormente, imputad@s e julgad@s por umha “falta leve” para a que, no entanto, se reservam importantes sançons económicas. A Polícia espanhola foi a autora da denúncia.

22/04/2009 - Continuando a actividade das últimas semanas, a recentemente constituida assembleia comarcal de Trasancos do organismo popular anti-repressivo vem de convocar as primeiras jornadas “em solidariedade com os presos independentistas galegos”. As citas serám nos próximos dias 24 e 25 de Abril e nelas abordará-se tanto a criminalizaçom jurídica da dissidência política como o contexto repressivo actual sobre o independentismo galego. Advogados do nosso organismo ministrarám ambas palestras.

21/04/2009 - Se na Alemanha ou a Itália um antifascista retirasse do espaço público esvásticas ou imagens de Hitler ou Mussolini, com certeza nom seria detido nem julgado: a simbologia fascista é proibida em ambos Estados e a exibiçom penada legalmente. Os espaços públicos estám livres da sua presença. Contodo, neste Estado do que Galiza fai parte à força, é a oposiçom activa a essa simbologia a que paradoxalmente remata nos tribunais sob justificaçons a cada mais exóticas. Onte, três independentistas galegos sentárom na bancada dos acusados para ouvir do ministério público, a câmara municipal e a ‘Asociación de Legionarios’ a demanda de penas de prisom e sançons de milhares de euros por (tratar de) retirar dum lugar público a estátua a um genocida espanhol.