17/05/2008 - Seria impossível facilitar informaçom diária sobre todas as arbitrariedades, abusos, extorçons, pequenas violências e imposiçons múltiplas a que som submetidos a diário @s quatro independentistas galeg@s que actualmente estám em prisom. O paradigma relacional entre carcereiros e presos é a força e a prepotência. A última notícia recebida neste sentido é que carcereiros do penal de Puerto de Sta. María I, situado a 1.100 quilómetros da residência habitual de Ugio Caamanho, acabam de roubar da cela do preso independentista a listagem de dezenas de endereços das pessoas com as que mantém correspondência postal.

16/05/2008 - ‘Instituciones Penitenciarias’ aplicou a ‘Doutrina Parot’ ao preso político galego Suso Cela Seoane. O militante comunista devia estar em liberdade desde 30 de Outubro de 2007, data em que se produziu a extinçom total da condena imposta pola Justiça espanhola. Além de prorrogar a sua privaçom de liberdade, Madrid aplica agora ao cidadám galego encarcerado desde 1990 a doutrina do ‘Tribunal Supremo’ espanhol que permite a acumulaçom de penas para cumprimento sucessivo, relegando a sua excarceraçom até o ano 2020.

15/05/2008 - Após meses em suspenso, o blogue ‘Com os pés na Terra’ em que participam os independentistas Giana Gomes, Sánti Vigo, Ugio Caamanho e José Manuel Sanches, actualmente presos e dispersadas, respectivamente, em Brieva (Ávila), Aranjuez (Madrid), Puerto de Santa María (Cádiz) e Aranjuez (Madrid), retomará o ritmo de publicaçom que em cada momento permitam as circunstáncias penitenciárias. Pode-se aceder a este web através da ligaçom que se anexa ao pé desta informaçom.

15/05/2008 - Carlos Cela, cidadám galego, militante comunista e pessoa solidária com os presos e presas políticas, suspendia na manhá de onte 15 de Maio a greve de fame que mantinha desde o 30 de Abril para exigir o seu direito a umha cela individual e o reagrupamento num módulo com outros presos políticos. A suspensom da medida de pressom sobre a direcçom de Valdemoro nom troujo até o momento o logro das suas reivindicaçons, embora ele próprio notificara o carácter limitado no tempo da sua iniciativa.

15/05/2008 - Publicamos como parte do nosso trabalho de solidariedade internacional frente à repressom o Manifesto ‘Euskal Herriak Askatasuna behar du’ (Euskal Herria necessita a Liberdade), enviado nesta semana polo Observatório Basco de Direitos Humanos Behatokia. O texto é um reconhecimento e apoio ao labor desenvolvido naquel país polo movimento pró amnistia e, mais concretamente, polos organismos Gestoras Pro-Amnistia e Askatasuna. Solicitamos a todas as pessoas, colectivos, associaçons e organizaçons políticas, sindicais e sociais do País a adesom a este documento de denúncia do processo que se celebra em Madrid contra 27 militantes bascos e bascas implicadas na denúncia da repressom.